Avokati i njohur, Spartak Ngjela, ka komentuar thyerjen e memorialit të vënë në zonën e Liqenit në Tiranë, në nder të viktimave të rëna në Turqi, si pasojë e grushtit të shtetit.
Përmes një postimi në Facebook, Ngjela shprehet se për vendosjen e memorialit të cilin e konsideron ‘të turpshëm’ dhe ‘antikombëtar’, nuk ka asnjë vendim ligjor.
Sipas Ngjelës, vetë akti i grushtit të shtetit ka qenë antikombëtar, pasi mendohet të ketë qenë një vepër e instrumentalizuar nga presidenti Erdogan.
“Por, kryeministri shqiptar duhet ta dijë se shqiptarët kanë qenë ata që e përmbysën osmanizmin në Turqi, pasi e luftuan për 500 vjet. Prandaj, këtu, në Shqipëri, mbijetesa osmane është pamundësi absolute”, shkruan Ngjela, ndër të tjera.
Postimi i plotë:
Shqiptarët i thanë Edi Ramës: Anadolli nuk ka vend në Shqipëri.
Ata sot, herët në mëngjes, thyen një pjesë të memorialit të turpshëm të të vrarëve në “grushtin e shteti” në Ankara, që mendohet se ka qënë një vepër e instrumentalizuar nga Rexhep Taip Erdogani për të ushtruar dhunë.
Mijra të burgosur vijojnë të vuajnë në një raprezalje antidemokratike në Turqi, si të implikuar në një grusht shteti fantazmë.
Kurse presidenti turk thotë se jam neoosman.
Por, kryeministri shqiptar duhet ta dijë se shqiptarët kanë qenë ata që e përmbysën osmanizmin në Turqi, pasi e luftuan për 500 vjet. Prandaj, këtu, në Shqipëri, mbijetesa osmane është pamundësi absolute.
Edhe diçka:
Për vendosjen e atij memoriali të turpshëm dhe antikombëtar, nuk ka asnjë lloj vendimi ligjor. Dhe, nuk ka sesi të kish kur ai ka qenë një akt antikombëtar. A e keni parë sesi autorët rrinë të fshehur dhe nuk japin asnjë lloj shpjegimi!
