Kryetari i Kuvendit Gramoz Ruçi ka renditur sfidat me të cilat do të përballet Kuvendi i Shqipërisë nëse në muajin Qershor miratohet hapja e negociatave të Shqipërisë me Bashkimin Evropian.
Ndër të tjera ai ka komentuar situatë politike në vendin tonë ku është shprehur se Tahiri është i vetmi deputet që ka dhënë dorëheqjen, edhe pse shumë prej parlamentarëve mbajnë një sërë akuzash mbi shpinë.
Gjatë një bashkëbisedimi me përfaqësues të mediave me rastin e Ditës së Evropës, Ruçi tha se do të rritet dhe do të forcohet roli monitorues i Kuvendit për të kontrolluar punën e Qeverisë.
“Sfidat më të reja me të cilat ne do përballemi pas çeljes së negociatave kërkojnë që Kuvendi të rrisë kontributin e tij. Puna jonë do të përqendrohet në fuqizimin e funksionit ligjvënës të Kuvendit, në përmirësimin e kuadrit ligjor për zgjedhjet në Shqipëri dhe për forcimin e rolit mbikëqyrës të Kuvendit përmes ushtrimit më intensiv të kontrollit parlamentar, rishikimin e kuadrit rregullator për mbikëqyrjen e veprimtarisë gjatë procesit të negociatave të anëtarësimit, garantimi i transparencës parlamentare, fuqizimi i kapaciteteve institucionale dhe modernizimi i administratës së Kuvendit, përmirësimin e etikës parlamentare. Kuvendi i Shqipërisë ka filluar përgatitjet për hapjen e negociatave”, u shpreh Ruçi.
Kryeparlamentari theksoi se roli legjislativ i Kuvendit përgjatë gati 30 viteve të pluralizimit, ka ardhur duke u rritur. Ky rol është vlerësuar së fundmi, tha Ruçi, nga raporti i Komisionit Europian që rekomandoi hapjen pa kushte të negociatave.
