Kryedemokrati Basha ka ripërsëritur thirrjen e tij, që të zbatohet plani me 5 pika i PD-së, ndërsa nënvizoi se vendi ndodhet në prag të kolapsit të vërtetë. Ai shigjetoi qeverinë se po vijon me neglizhencën dhe nuk zbaton planin me 5 pika të propozuar nga opozita. Kreu i PD-së fajëson Ramën se ka gënjyer 6 muaj për pandeminë, për shifrat dhe ndihmën.
“Është një gjendje që po vjen duke u thelluar, është një krizë, një kolaps i vërtetë, që kërkon domosdoshmëri urgjente për të ndërmarrë hapa që opozita dhe unë personalisht i kemi formalizuar në planin me 5 pika.
Nuk mund të shpreh revoltën nga shpërfillja që qeveria iu bën qytetarëve, ndërkohë që shifrat rriten. Të sëmurët me diagnoza të tjera e gjejnë veten mes dy zjarreve.
Kjo qeveri dhe ky kryeministër gënjen, kanë gënjyer 6 muaj për pandeminë, për shifrat, për trajtimin, ndihmën, por që të vazhdojnë të gënjejnë ditë për ditë, në vend që të marrin masa. Kjo duhet të jetë një kambanë që s’duhet të resht së bjeri nga mëngjesi deri në darkë.
Kemi shpalosur planin me 5 pika, për t’u përballur me aspektin shëndetësor dhe ekonomik të krizës që po thellohet”, deklaroi Basha.
