Kjo ditë e hënë shënon 77 vjetorin e Çlirimit të Shqipërisë nga pushtuesit nazistë të Luftës së Dytë Botërore. Gjatë kësaj lufte, Ushtria Nacionalçlirimtare e Shqipërisë bëri kryengritje të armatosur kundër pushtimit të vendit. Politika e feston e ndarë këtë datë. E djathta feston 28 nëntorin si ditën e Pavarësisë dhe të Çlirimit, ndërsa 29 nëntori është festë vetëm për të majtën.
Sot është dita e madhe e historisë sonë kombëtare, që shënon dhe simbolizon çlirimin e atdheut prej pushtuesve nazifashistë e bashkëpunëtorëve të tyre vendas. Është 29 nëntori, festa jonë e lirisë, ku në fokus qëndron sakrifica dhe heroizmi i popullit shqiptar dhe luftës partizane që ai zhvilloi.
Kryeministri Rama ndau me ndjekësit në rrjetet sociale një video nga Rruga e Arbrit, dhe në këtë formë, i uron shqiptarëve gëzuar 29 nëntorin, festën e Çlirimit të Shqipërisë.
Sakaq, kryetarja e Kuvendit, Lindita Nikolla, ka uruar shqiptarët me rastin e 29 nëntorit, ditës së Çlirimit të atdheut. Kryeparlamentarja nënvizon se sot është dita e mirënjohjes ndaj çlirimtarëve dhe e nderimit të dëshmorëve të lirisë.
“Gëzuar 29 Nëntorin, Ditën e Çlirimit të Shqipërisë!
Në Luftën për çlirim shqiptarët u bashkuan rreth vlerave të antifashizmit dhe të lirisë, vlera të cilat qëndrojnë në themelet e Shqipërisë demokratike.
Lavdi Dëshmorëve të Atdheut!”, shkruan Nikolla.
