Mbrëmjen e së mërkurës, një sasi lëndë plasëse ka shpërthyer në Sarandë në lagjen nr. 4. Lënda plasëse është vendosur në garazhin e hotelit ‘Yacht Premium Hotel’, i cili është në pronësi të Mariel Muratit, ish-Drejtor i ALUIZNI-t Sarandë dhe aktualisht Drejtor i FSDKSH (Fondi i Sigurimit të Detyrueshëm të Kujdesit Shëndetësor) në Sarandë. Sipas policisë, sasia e lëndës plasëse ka qenë e vogël dhe nuk ka dëme të shumta materiale. Hoteli ndodhet në linjën e parë të detit, në anën e ankorimit të jahteve dhe të trageteve në portin e Sarandës.
Njoftimi i policisë
Policia e Sarandës vijon hetimet intensive për zbardhjen e ngjarjes së ndodhur mbrëmjen e së mërkurës në lagjen numër 4 të qytetit, ku në hyrjen e garazhit të një hoteli të njohur ka shpërthyer një sasi eksplozivi. Ngjarja ndodhi rreth orës 22:40, në lagjen nr.4, Sarandë, në hyrjen e garazhit të hotelit në pronësi të shtetasit Mariel Murati. Pronari i hotelit, Murati u shkarkua ne korrik 2018 si drejtor i ALUIZNI-t nga Ministrja e Drejtësisë aso kohe Etilda Gjonaj, e cila e çoi edhe për ndjekje penale.
Disa kohë me vonë u emërua Drejtor i FSDKSH, detyrë që e vazhdon edhe sot. Nga shpërthimi fatmirësisht nuk pati persona të lënduar, por vetëm dëme të vogla materiale. Forcat e Policisë dhe grupi hetimor në vendin e ngjarjes kanë mbledhur provat, teksa janë sekuestruar edhe pamjet e kamerave të sigurisë, për të bërë të mundur zbardhjen e plotë dhe identifikimin e autorëve. Në pyetje është marrë dhe pronari i hotelit, për të zbuluar konflikte të mundshme të tij që mund të kenë sjellë dhe ngjarjen e mbrëmjes së kaluar.
Tritol për herë të dytë
Kjo është hera e dytë që hotelit në pronësi të Mariel Muratit i është vendosur tritol, kjo pasi edhe një vit më parë në shkurt të vitit 2021, i kanë vendosur lëndë plasëse. Nuk dihen ende autorët, ndërsa policia po punon për identifikimin dhe kapjen e tyre.
Një vit më parë, më 9 shkurt të vitit 2021, në të njëjtin hotelin u vendos sërish një sasi tritoli në tarracë, e cila shpërtheu sapo roja ndezi dritën. Policia konfirmoi se tritoli ishte i lidhur me rrymën elektrike, dhe sapo roja në atë kohë është futur brenda godinës dhe ka ndezur dritën, ka shpërthyer edhe sasia e eksplozivit. Nga ngjarja e vitit të kaluar nuk pati lëndime në njerëz, por vetëm dëme materiale.
