Italia është shteti më i prekur nga koronavirusi, dhe me numrin më të lartë të viktimave pas Kinës. Vatra e Italisë nga koronavisuri ka qenë e përqendruar në Milano dhe në zonat më rurale që e rrethojnë atë, në provincat Lombardi dhe Veneto.
Më shumë se 31.000 njerëz janë diagnostikuar me virusin në vendin e goditur nga kriza, dhe të paktën 2.503 njerëz kanë vdekur.
Për të përballuar këtë situatë emergjente, në ndihmë kanë ardhur mjekët kinezë. Pasi Kina ia doli të mposhtë koronavirusin, e tashmë ka nisur jeta normale, në një gjendje të mjerueshme ndodhet Italia.
Mjekët e parë nga Kina kanë mbërritur në aeroportin e Malpensës. Ata do të ndihmojnë me ekspertizën e tyre mjekët vendas, për të përballuar situatën e rëndë nga virusi kinez.
Më konkretisht bëhet fjalë për 7 doktorë dhe 3 teknikë e infermierë nga Shangai, që ishin nisur disa ditë më parë. Bashkë me ta mbërritën dhe 20 ton materiale mjekësore të nevojshme për pandeminë Covid-19.
Në momentin e mbërritjes, ekspertët kinezë shfaqën një parrullë ku shkruhej “Grupi i ekspertëve kinezë kundër epidemisë në Itali”.
Ata u pritën në aeroport nga zv/presidenti i rajonit të Lombardisë, Fabrizio Sala.
