Ministri i Brendshëm, Sandër Lleshaj ka komentuar operacionin e zhvilluar sot, ku një fëmijë i cili mbahej peng prej 18 muajsh në mal është shpëtuar.
Përmes një postimi në Facebook, Lleshaj thotë se sot përfundoi kalvari i rëndë i këtij fëmije që duhet të shërbejë si një thirrje për më shumë ndjeshmëri shoqërore kundër dhunës.
Fëmija i mitur ishte rrëmbyer nga babai i tij dhe mbahej peng në male që prej muajit nëntor të vitit 2018.
Postimi i plotë:
Sot përfundoi një kalvar i rëndë i një fëmije, i cili mbahej peng në male nga…babai i tij, që prej nëntorit të vitit 2018.
Nga sot ky fëmijë mund t’i rikthehet jetës dhe nëna e tij e munduar mund të çlirohet nga një makth i tmerrshëm.
Le të shërbejë ky lajm pozitiv si një thirrje tjetër për më shumë ndjeshmëri shoqërore kundër dhunës.
Le të shërbejë ky moment edhe si një thirrje për më shumë burrëri e përgjegjësi, nga ata burra prindër, të cilët duhet të kuptojnë se vendi i fëmijëve është në familje dhe në shkollë.
Falënderime për këtë operacion të suksesshëm të Policisë në Mirditë!
