Një ngjarje e rëndë është regjistruar mbrëmjen e djeshme në Shkodër, teksa një shpërthim i madh ndodhi në banesën e një polici.
Shpërthimi ndodhi gjatë orës 22:50 mbrëmjen e djeshme, ndërsa nuk raportohet të ketë pasur të lënduar. Sulmi u bë ndaj policit Prelë Milani me detyrë komandant poste në Theth.
Mësohet se vetëm pak minuta para shpërthimit, polici kishte dalë nga shtëpia pasi ishte në shërbim gjatë natës. Brenda në shtëpi bëhet me dije të kenë qenë bashkëshortja dhe vajza e tij.
Sasia e lëndës plasëse e dyshuar si tritol është vendosur në pjesën e pasme të banesës së policit i cili banon në një shtëpi private në zonën e Zooteknikës. Shpërthimi ka ndodhur afër një barake ku nuk jeton askush dhe përdoret si magazinë nga familja.
Polici e kishte ndjerë shpërthimin por nuk e kishte kuptuar se kishte ndodhur në banesën e tij, teksa është lajmëruar më vonë nga familjarët. Milani dyshon se ngjarja mund të ketë ardhur për shkak të detyrës së tij dhe me rastet e asgjësimit të lëndëve narkotike si pjesë e shërbimeve policore.
Në Dukagjin kanë ndodhur dy vrasje në fund të 2019, teksa është vrarë Lazër Arra dhe pas tij Gjergj Krytha. Që të dyja vrasjet mendohen se kanë ardhur si pasojë e kultivimit të bimëve narkotike.
