Detaje të reja janë hedhur në dritë lidhur me vendosjen e tritolit në Lushnje. Vëllai i pronarit të banesës, ka përjashtuar mundësinë e një konflikti që ka sjellë në ngjarjen e rëndë. Jetmir Çoku, vëllai i Besnik Çokut, pronarit të banesës ku u vendos tritoli, në një prononcim për mediat është shprehur se kanë qenë në gjumë në momentin e shpërthimit dhe se nuk kanë dijeni për identitetin e autorëve.
“Unë jam vëllai i Besnikut. Kemi qenë në gjumë. Nuk dimë gjë pse e bënë këtë. Ne nuk kemi konflikt me asnjë. Nuk dyshojmë tek askush”, tha ai para mediave.
Ngjarja ka ndodhur sot rreth orës 02:35, në lagjen “Gafurr Muço”, Lushnje, në katin e parë të një pallati parafabrikatë, ku shpërtheu një sasi e vogël lënde plasëse në afërsi të derës së jashtme të banesës së shtetasit B. Ç. Si pasojë e shpërthimit është dëmtuar dera e kësaj banese dhe e banesës përballë saj, në pronësi të shtetasit L. B.
