Shpërthim i fuqishëm në Tiranë, i vihet eksploziv makinës së prokurorit (Emri)

Një shpërthim i fuqishëm ka ndodhur mbrëmjen e sotme në zonën e Komunës së Parisit, në Tiranë.

Mësohet se makinës së prokurorit Arjan Muça, i është vënë lëndë plasëse. Mjeti tip ”Mercedes Benz” ishte parkuar pranë qendrës tregtare “Kristal” në momentin që ka ndodhur shpërthimi.

Lajmi u konfirmua edhe nga drejtori i Policisë Tiranë, Rebani Jaupaj, i cili shtoi se nga shpërthimi nuk ka të lënduar.

”Me datë 11.03.2021, rreth orës 19:30, tek Komuna e Parisit, në rrethana ende të paqarta ka shpërthyer dyshohet si pasojë e lëndës plasëse mjeti i parkuar në pronësi të shtetasit A. M., ku ka vetëm dëme materiale.”, informon policia.

Makina e prokurorit ka shpërthyer në pjesën e përparme të saj dhe në ato momente nuk ka pasur njeri aty pranë.

Grupi hetimor ndodhet ne vendngjarje dhe po punon për zbardhjen e plotë të  rrethanave të ngjarjes.

Shërbimet e Policisë po kontrollojnë zonën si dhe janë ngritur pika kontrolli me qëllim kapjen e autorit.