Nga Anxhela Ferra
O ti që më flet kot më kot..
Në Tepelen, nga ftohma e pa ushqyer
Shpirt dhashë unë e fëmije plot,
Që janë atje groposur , kalbëzyer.
S’do zëri yt për atë krim te flasë;
Mohon torturat tona n’ato vënde;
Dhe nga list-vdekja do t’na fshish me gjasë!
Këto janë disa nga vargjet e poetit Uran Kostreci në sonetën “Vdekja civile”. Fjalë drejtuar gjithë atyre të cilët sipas tij, guxojnë të mohojnë krimet e ndodhura në kampin e Tepelenës. Ish-i burgosuri në një intervistë për Tirana Today, shprehet se debati nëse ai kamp ishte si Auschwitz apo jo, është shumë i padobishëm. Madje për të ishte më keq se kampi nazist.
“Po si more, futët në burg brenda telave fëmijë 2 javësh apo 2-3 vjeç. E pastaj vjen e thua, ai ishte kamp i mirë. Po atje brenda, vetëm në 24 orë kanë vdekur rreth 20 fëmijë. Nga e ftohta, morrat, pisllëku, pangrënia. Ai kamp është shfarosës. Madje për mua është më keq se Auschwitz. Edhe pse është diçka makabre, gjermanët i futën në dhoma me gaz dhe i mbytën për 5 minuta. Kurse këta i morën shpirtin gjithë atyre fëmijëve pak nga pak. Kjo është më e rëndë akoma. Pse u dashka vrarë me gaz që të quhet kamp shfarosës.”
Kostreci akuzon historianin Pëllumb Xhufi se është duke shtrembëruar faktet dhe mohuar të vërtetat.
“Xhufi e ka në shpirt këtë ligësinë dhe komunizmi i dhimbset. Pasi ishte komunizmi që e çoi në shkollë dhe ai ka lidhje familjare e farefisnore me Enver Hoxhën e Ramiz Alian. Ai ishte komunist, si gjithë të tjerët. Nuk është historian ai, pasi një i tillë nuk ka mundësi t’i shtrembërojë faktet. Historiani i thotë faktet ashtu siç janë. Dhe nëse nuk thotë të vërtetën, ai është sharlatan. Këta njerëz meritojnë vetëm të futen në çmendinë, asgjë tjetër.” TIRANA TODAY
