Këngëtarja e njohur Eneda Tarifa është shpallur fituesja e edicionit të 21 të festivalit Kënga Magjike.
Festivali i cili u zhvillua mbrëmjen e djeshme solli shumë risi në krahasim me vitet e kaluara. Për vite me radhë në këtë kompeticion janë shpërndarë 20 çmime për 20 finalistë, por kjo gjë ndryshoi në këtë edicion. Vetëm 6 çmime u dhanë mbrëmë: 3 çmime për tre vendet e para ndërsa tre çmimet tjera për kategoritë “Best New Artist”, “Best New International Artist” dhe “Best Big International Artist”.
Çmimi për artistin e ri më të mirë shkoi për këngëtarin nga Kosova por që jeton në Gjermani, Khuba. Ndërsa çmimi “Best New International Artist” shkoi për dyshen nga Italia “Sizma”. Kurse Tamara Todevska nga Maqedonia u shpall si artistja më e mirë internacionale.
Një ndryshim tjetër në këtë kompeticion ishte edhe sistemi i votimit. Përveç votimit të artistëve, këtë vit u shtua edhe votimi i publikut dhe ai i jurisë.
Në fillim u treguan pikët që artistët kishin dhënë për njëri-tjetrin, ku bindshëm vendin e parë e mbante Eneda Tarifa. Më pas është zbuluar edhe votimi i jurisë, e cila pikët maksimale ia dha Tamara Todevskës. Por ky votim nuk ndryshoi gjë në renditjen e 3 këngëve të para. Më pas u zbulua edhe votimi i publikut i cili i dha më shumë pikë këngëtares Fifi, plot 300 pikë.
Votimi i publikut bëri që Fifi të renditej nga vendi i tretë në vendin e dytë, por nuk ndryshoi gjë për vendin e parë.
Kështu 5 këngët më të votuara për mbrëmjen e djeshme ishin këto:
Në vend të parë – Eneda Tarifa
Në vend të dytë – Fifi
Në vend të tretë – Anxhela Peristeri
Në vend të katërt – Tamara Todevska
Në vend të pestë – Marsela Çibukaj
