Deputetja e Kuvendit të Kosovës nga rradhët e Lëvizjes Vetëvendosje, Fatmira Kollçaku, mbrëmjen e djeshme ka lëshuar një deklaratë që i ka befasuar të gjithë. Ajo u shpreh e revoltuar për seancën e mbajtur në Kuvend, pasi nuk ka siguri. Kollçaku tha se në sallë nuk ekzistojnë kushte për tubim, në kohën e pandemisë. Sipas saj, një mbledhje e mbajtur në të tilla kushte, është një mesazh turpi dhe i gabuar, që nuk duhet të tejçohet te qytetarët.
Ajo iu bëri thirrje mjekëve që nëse deputetët infektohen me COVID-19, të mos iu vendosin respiratorë. “Ky mesazh që shkon nga kjo sallë është turpi. Unë kam thënë sot pa ardhur, pas pak fillon seanca e turpit dhe qëndroj prapa saj.
Sot e kam postuar një video-spot, BBC që e ka jap të njerëzve që punojnë në kujdesin intensiv qendror, dhe i ftoj të gjithë ata që asnjë deputet nëse do të infektohej mos t’ia qesin respiratorin, sepse ne nuk jemi mbi ligjin. A po mendoni që jemi me imunitet politik e jemi edhe me imunitet karshi sëmundjeve, apo si deri tani gjithë politikbërësit kanë qenë mbi ligjin, mbi shtetin, kurrgjë nuk ka vlejte, do të thotë edhe në kohë të pandemisë ne jemi mbi ligjin”, tha ajo.
“Si politikane nuk do të bëj panik, si epidemiologe po jam në ankth, sepse jo sot, por po e ritheksoj këtu nuk ka pasur kushte për tubim si ky, për format si ky, ne nuk kemi kërkuar pezullimin e punës së Kuvendit të Republikës së Kosovës, në asnjë rrethanë, por formate të tjera në distancë, me kushte. A po mendon dikush që kjo foltore që dezinfektohet brenda një minute, dezinfektuesi arrin efektin e vet a? Ju po mashtroheni!”, u shpreh Fatmira Kollçaku.
