Miqtë e ngushtë të të ndjerit, Klodian Rasha, thanë se nuk do të iknin nga protesta deri në plotësimin e kërkesës së tyre, për largimin e ministrit Lleshaj nga pushteti. Të afërmit e të ndjerit e shokët e ngushtë të 25-vjeçarit, kanë thënë për mediat se nuk do të lëvizin për asnjë çast. Ata kërkojnë një zëri, që të ketë një reagim nga ana e institucioneve. Në të kundërt, paralajmërojnë se protesta do të përshkallëzohet.
Bora Rasha, motra e Klodian Rashës, kërkoi drejtësi për vëllanë. Ajo tha se në momentin që ndodhi ngjarja ka qenë në Itali, ndërsa erdhi sot për ta përcjellë për në banesën e fundit. Nga protesta përpara Kryeministrisë, ajo deklaroi se vëllai ishte me shokët deri në orën 11:30, dhe më pas kishte shkuar të merrte një paketë, por u vra.
