20-vjeçarja shqiptare, Sabrina Lekaj, e cila u vra nga i ati në Australi, u përcoll dje në banesën e fundit.
Të pranishëm në këtë ceremoni, miq familjarë e të afërm i dhanë lamtumirën studentes ekselente, por ajo çfarë i ka bërë të gjithë të shpërthejnë në lot ka qenë fjalimi i vëllait të saj të vogël.
Vëllai i të ndjerës, Pirro Lekaj, vetëm 11 vjeç i preku të gjithë të pranishmit me fjalimin e tij.
“Ajo ishte shumë e zgjuar dhe gjithmonë ka ndikuar te unë. Falë saj jam ky që jam. Më ka ndihmuar me studimet, të bëhesha i suksesshëm në jetë, sepse ajo këtë dëshironte.
Motra ime ishte shumë e dashur dhe e kujdesshme, shkonim kudo bashkë, në park, dyqane etj. Ne qëndronim gjithmonë ulur në dhomë pranë njëri-tjetrit dhe shihnim televizor së bashku.
Ishim shumë të lidhur me njëri-tjetrin dhe bisedonim bashkë për problemet tona”, tha Pirro me dhimbje, duke i përlotur të gjithë.
Ngjarja e rëndë ndodhi dy javë më parë, kur policia në Adelaide të Australisë Jugore gjeti të vdekur 20-vjeçaren shqiptare, Sabrina Lekaj, dhe të plagosur babanë e saj, Petrit Lekaj, 49 vjeç. Dyshohet se pasi goditi vajzën e tij, 49 vjeçari Lekaj ka tentuar të vrasë edhe veten e tij.
