Dy pacientë kanë humbur jetën në Spitalin Infektiv në 24 orët e fundit. Ministria e Shëndetësisë, në përditësimin e radhës, thotë se dy vdekjet ishin të papritura. Pacientët kanë qënë me sëmundje bashkëshoqëruese. Bëhet fjalë për një 76-vjeçar nga Tirana dhe një 54-vjeçar.
“Gjatë 24 orëve të fundit, për fat të keq dy qytetarë nuk e kanë fituar dot betejën me sëmundjen, pavarësisht asistencës së madhe të mjekëve dhe trajtimit mjekësor.
Dy humbjet e jetës kanë qenë të papritura. Një 76-vjeçar nga Tirana, me disa sëmundje bashkëshoqëruese, pasi ishte përmirësuar pas 15 ditësh trajtim, ka pësuar tromboemboli pulmorare. Dhe një 54-vjeçar në gjendje të rëndë, me insuficencë renale, ka ndërruar jetë në urgjencën e spitalit”.
Po kështu Ministria njofton se situata paraqitet serioze në Spitalin infektiv, ku aktualisht po trajtohen 87 pacientë, 15 prej tyre janë në terapi intensive, ndërsa 2 janë të intubuar.
