Koronavirusi vdekjeprurës që po përhapet me shpejtësi në Kinë dhe jashtë saj ka marrë deri më tani 170 jetë njerëzish.
Autoritetet shëndetësore bëjnë me dije se koronavirusi ka prekur secilin rajon të Kinës. Rastet me këtë koronavirus janë raportuar edhe në të paktën 16 vende të tjera, ndërsa numri i të infektuarve ka kaluar 7,700.
Koronavirusi, që është një familje e gjerë virusesh, është shfaqur për herë të parë në dhjetor të vitit të kaluar në qytetin Wuhan të Kinës.
Organizata Botërore e Shëndetësisë (OBSH) takohet sot për të vendosur nëse ky koronavirus përbën emergjencë globale shëndetësore ose jo.
“Në ditët e fundit, përparimi i virusit sidomos në disa vende dhe transmetimi i tij nga njeriu në njeri përbëjnë shqetësime për ne. Edhe pse numri i rasteve jashtë Kinës është ende relativisht i vogël, ai ka potencial të rritet edhe më shumë”, tha drejtori i përgjithshëm i OBSH-së, Tedros Adhanom Ghebreyesus.
