Mjafton që një person i infektuar të kollitet, për të shpërndarë infeksionin në mënyrë të shpejtë, e po kaq të frikshme në ambientin ku ai ndodhet.
Janë shkencëtarët të cilët e kanë konkretizuar këtë fakt përmes pamjeve, që qytetarët të vetëndërgjegjësohen, dhe të jenë të pajisur me maska e doreza. Kjo si një formë mbrojtëse ndaj infeksioneve që qarkullojnë, e po kështu të zbatojnë distancimin social.
Në videon në fjalë tregohet se si pikat vdekjeprurëse të koronavirusit, mund të përhapen nëpër raftet e supermarketit dhe të infektojnë blerësit. Njerëzit mund të kalojnë infeksionin tek njëri-tjetri, edhe nëse janë gjashtë metra larg.
Ekspertët nga Universiteti Aalto në Finlandë e kanë publikuar këtë video, në mënyrë që blerësit të jenë të vetëdijshëm për rreziqet e përhapjes së kësaj sëmundje vdekjeprurëse.
“Dikush i infektuar nga koronavirusi, mund të kollitet dhe lë pas grimcat e vogla aerosoli që mbajnë koronavirusin. Këto grimca më pas mund të përfundojnë në traktin respirator të njerëzve të tjerë”, shprehet Asistent Profesor i Universitetit Aalto, Ville Vuorinen.
Studiuesi shprehet se grimcat që mbartin virusin, mund të qëndrojnë në ajër për një kohë të gjatë.
“Rezultatet paraprake tregojnë se grimcat e aerosolit që mbartin virusin mund të qëndrojnë në ajër më gjatë sesa mendohej fillimisht. Kështu që është e rëndësishme të shmangni hapësirat e mbyllura publike. Kjo gjithashtu zvogëlon rrezikun e infeksionit nga spërklat, e cila mbetet rruga kryesore e transmetimit të koronavirusit. Nëse ju duhet të shkoni, atëherë shkoni sa më rrallë që të jetë e mundur. Dhe qëndroni atje sa më pak të jetë e mundur”, tha për BBC profesori Ville Vuorinen.
