Një studim i fundit ka dalë në përfundimin se të shëruarit nga COVID-19 krijojnë antitrupa. Rezultatet janë pasyruar nga një studim shkencor kinez. Kërkuesit kanë zbuluar se të gjithë personat e infektuar, pas 19 ditësh krijojnë antitrupa, e nuk sëmuren.
Rezultatet e studimit kinez janë botuar në revistën prestigjioze “Nature Medicine”. Sipas hulumtuesve kinezë, të gjithë pacientët e shëruar nga COVID-19 zhvillojnë antikorpe, në sasi të ndryshme.
Më në detaj, 100% e të prekurve nga virusi pandemik, zhvillojnë antikorpe të tipit IgG, që prodhohen pas prodhimit të atyre Igm, që janë antikorpet që aktivizohen normalisht nga organizmi kur reagon ndaj një infeksioni të ri.
Antikorpet IgG mbrojnë për një periudhë më të gjatë personin. “Në qoftë se bazohemi tek precedentët e SARS dhe Mers, këto antikorpe duhet të mbrojnë nga rikthimi i koronavirusit, për të paktën një periudhë 12-24 mujore. Një lajm i madh”, nënvizoi Guido Silvestri, që drejton laboratorin Emory, një nga më të avancuarit në botë përsa i përket Imunologjisë.
Këto janë të dhëna të cilat duhet të zhvillohen më tej, për të qenë plotësisht të sigurt. Rezultatet në fjalë duhet të verifikohen në studime të mëtejshme.
