Shkencëtarët kinezë: Koronavirusi s’do zhduket, do rikthehet në formën e një gripi

Teksa shkencëtarët janë në pritje të daljes së një vaksine, një grup tjetër kërkuesish mendojnë se koronavirusi nuk do zhduket. Sipas tyre, me gjasë do rikthehet si një virus sezonal, në formën e një gripi. Shkencëtarët kinezë nuk japin shpresa se çdo gjë do marrë fund me krijimin e një medikamenti, por do jetë ripërsëritës.

Mjekët kanë pranuar se virusi me shumë gjasa nuk do të eliminohet plotësisht, dhe pavarësisht karantinimit dhe masave të tjera shtrënguese. Një grup virologësh dhe kërkuesish kinezë, raportuan sot nga Pekini se virusi nuk do të zhduket ashtu siç bëri SARS. Ndryshe nga ai, Covid-19 mund të infektojë edhe asimptomatikët. Ata shprehen se virusi mund të përhapet pa përjetuar shenjat si temperatura e lartë dhe kollë, duke e bërë të vështirë gjurmimin e përhapjes së tij.

Sikundër shpesh do përmendet kohët e fundit, epidemia do të jetojë shumë gjatë me ne. Aq sa do të na kthehet në një mënyrë jetese.

Sipas drejtorit të Institutit të Patologjisë Biologjike pranë Akademisë Kineze të Shkencave Mjekësore, “Ka shumë gjasa që kjo epidemi të bashkëjetojë me njerëzit për një kohë mjaft të gjatë. Dhe të shndërrohet në sezonale dhe të mbartet brenda trupit të individit”.