Kryeinspektori i Përgjithshëm, Shkëlqim Hajdari ka qetësuar fermerët duke premtuar mbledhjen, magazinimin dhe eksportimin e prodhimeve të tyre.
Në një lidhje Skype për emisionin “Alert” në News24, Hajdari tha se prodhimi ka qenë me bollëk, por shpërthimi i koronavirusit e ka çorientuar situatën e tregut.
“Isha në Lushnje, ku do të bëhet maksimumi për mbështetjen ndaj prodhimeve, sidomos luleshtrydhes, na premtuan që do merret i gjithë prodhimi me çmime favorizuese. Kemi qenë në kontakt me fermerët, me AKU dhe drejtorin e saj Robert Lili. Duhet që prodhimet të jenë cilësore, i bëj thirrje fermerëve që të jenë të qetë pasi prodhimi i tyre do mblidhet, magazinohet dhe do eksportohet. Kemi pasur një situatë me prodhim me bollëk, na qëlloi keq situata nga pandemia, çorientuese për tregun. Morëm këtë iniciativë, bashkuam interesa të përbashkëta, iu drejtuam Kosovës e Maqedonisë që ta zgjidhim. Është nismë që i çliron dhe i krijon mundësi të reja të zinxhirit mes fermerëve dhe grumbulluesve. Prodhimet tona po prisheshin, por grupi i interesit i instaluar në Shqipëri, me kohë ka fërkuar duart. Detyra jonë bashkë me AKU dhe inspektoratin shëndetësor është që ata që prodhojnë jashtë standardeve, me kimikate, të këtyre pak kokrrave që na prishin zinxhirin ushqimor, AKU që nga dita e nesërme do t’i asgjësojë”, tha kryeinspektori i Përgjithshëm.
Shkëlqim Hajdari paralajmëroi burg për ato kompani bujqësore, të cilat tregtojnë kimikate që dëmtojnë cilësinë e bimës. Ai sqaroi se firmat do t’i nënshtrohen kontrolleve dhe nëse i kalojnë me sukses, ato do të marrin mbështetje nga qeveria.
“Kompanitë që i shërbejnë bujqësisë po i japin fshatarëve kimikate që dëmtojnë cilësinë e bimës, do përfundojnë në burg. Kam informacione të bollshme, kishte firma që pranuan pa asnjë fitim, gjithë ndihmat ndaj fermerëve do kalojnë në kontrolle. Nëse firmat i kalojnë me sukses kontrollet, atëherë ato do mbështeten nga qeveria. Shqipëria ka krijuar infrastrukturë të mirë të prodhimit të frutave dhe perimeve. Problemet janë të mëdha, por në këtë situatë pandemie, prodhoni, prodhoni pa merak dhe me cilësi se i gjithë prodhimi është marrë përsipër nga qeveria dhe kompanitë për eksportin e tyre në Kosovë dhe Maqedoni. Në këtë situatë nuk do lëmë asnjë produkt të prishet, nuk do ketë vend për grosistët e importit që vendosën të prishin prodhimet. Prodhimet tona nuk janë me çmime më të larta se të importit, fermerët tanë fitojnë shumë pak”, nënvizoi Shkëlqim Hajdari.
