Presidenti Ilir Meta ka ftuar për një takim në Presidencë gjyqtarin Besnik Muçi.
Kreu i shtetit pritet të diskutojë me Muçin në lidhje me shkarkimin e tij nga KPA dhe ankimimin e këtij vendimi nga gjyqtari.
Presidenca bën të ditur se Meta i kërkoi Muçit që të vlerësonte mundësinë që të rishikonte qëndrimin e tij më të fundit, për të kërkuar nga Gjykata Kushtetuese që të shprehej me vendim për të deklaruar përfundimin e mandatit të tij si gjyqtar kushtetues.
Mësohet se Muçi i ka thënë presidentit se, procesi i rivlerësimit kalimtar i kryer në Kolegjin e Posaçëm të Apelimit ka qenë tepër diskriminues edhe për faktin e qëndrimeve të tij si gjyqtar kushtetues. Gjyqtari i tha Metës se nuk është politikan, por një jurist dhe duhet të veprojë si i tillë deri në fund për të kërkuar të drejtat e tij pranë çdo gjykate ndërkombëtare, vendimi i së cilës ka juridiksion ndaj Republikës së Shqipërisë.
Besnik Muçi qëndroi për rreth 30 ditë në postin e anëtarit të Gjykatës Kushtetuese dhe ishte dekretuar në këtë pozicion nga Presidenti Ilir Meta.
Kujtomë se shkarkimi i tij u lajmërua ditën e djeshme. Ndërsa ditën e sotme, Muçi i dërgoi një letër Gjykatës Kushtetuese duke i kërkuar që të marrë një sqarim nga ky institucion.
