Ish-presidenti, Bamir Topi shprehet se kriza politike i ka rrënjët në ndryshimet kushtetuese të vitit 2008. Në emisionin ‘Open’, Topi këmbënguli se që prej asaj dite, është dëmtuar sistemi dhe balanca e institucioneve. Që në krye të herës, Topi ka deklaruar se të gjithë presidentët kanë kaluar sfida. Më tej ai ka shtuar se pas periudhës së presidentit Berisha, asnjë prej tyre nuk ka kaluar në qetësi mandatin presidencial.
“Të gjithë presidentët e tranzicionit, kanë kaluar sfida. Nuk besoj se pas periudhës së presidentit Berisha, dikush të ketë kaluar në qetësi mandatin presidencial.
Gjithçka që po ndodh është për shkak të asaj marrëveshje, të datës 15 prill 2008. Pas 2008, institucioni i presidentit u bë më i dobët. Cilido që të jetë në Presidencë, nuk do të ketë iluzion se nuk është nën tutelën e kryetarit të mazhorancës. Kemi Republikë Kryeministrore, jo Parlamentare. Është dëmtuar rëndë sistemi dhe balanca e institucioneve”, tha Topi.
Pyetjes se kush ka të drejtë, Rama apo Meta, Topi tha: “Këtë nuk mund ta them kurrë. Këto lloje konfliktesh ua besoj institucioneve, si Gjykata Kushtetuese. Nuk besoj që dikush duhet të marrë guximin nëse mazhoranca ka të drejtë, apo nuk ka të drejtë”.
