Deputetja e Partisë Socialiste, Eglantina Gjermeni ka reaguar sa i përket ngritjes së komisionit hetimor, për shkarkimin e presidentit Meta.
Gjermeni u shpreh për “Abcnews”, se mazhoranca është e vendosur që ta çojë gjer në fund këtë proces, teksa shtoi se ajo do që të gjithë të kuptojnë që Kushtetuta është e paprekshme dhe duhet respektuar.
Sipas saj, zhdekretimi i datës së zgjedhjeve vendore dhe dekretimi i një date tjetër siç ishte 13 Tetori duhen parë në kontekstin e Kushtetutës, nëse ajo ja jep atij këtë kompetencë apo jo.
“Mendoj që fakti që një grup deputetësh firmosën dhe më pas u ngrit një Komision Hetimor, u votua nga pjesa më e madhe e deputetëve, mendoj që tregon një vullnet për t’i shkuar deri në fund këtij procesi faktit që është shkelur apo jo Kushtetuta. Faktit që me çdekretimin e datës së zgjedhjeve vendore dhe me dekretimin e një date tjetër siç ishte 13 Tetori, të gjitha këto të shikohen në kontekstin e Kushtetutës, në kontekstin e përgjegjësive që ka Presidenti, detyrave që ka ai, çfarë i lejon dhe nuk i lejon Kushtetuta. Ju e thatë që ndodh për herë të parë. Këtë vit kemi shumë gjëra për herë të parë, kemi djegie mandatesh për herë të parë, kemi mosmarrje pjesë në zgjedhje, kemi çdekretim të zgjedhjeve në mes të fushatës. Mendoj që i gjithë vullneti politik i mazhorancës dhe jo vetëm është që ky proces të shkojë deri në fund dhe të nxjerrë mësime për faktin që nëse flasim për një kuadër institucional, ligjor, për Kushtetutën, të gjitha këto janë të paprekshme dhe duhen zbatuar nga të gjithë”, deklaroi Gjermeni.
