Më herët, mazhoranca është tërhequr nga shkarkimi i Kreut të Shtetit, Ilir Meta. Deputetët socialistë kanë deklaruar në Komisionin Hetimor se shkeljet e kryera nga Meta nuk përbëjnë shkak për shkarkim. Konstitucionalisti Shkëlqim Hajdari, u pyet mbrëmjen e sotme në emisionin “Repolitix” se pse u tërhoq mazhoranca. Ai tha qartësisht se mazhoranca ka marrë parasysh rekomandimet e Komisionit të Venecias.
“Janë munduar aktorët politikë që ta komentojnë mos shkarkimin. Shkarkimin e certifikon Gjykata Kushtetuese. Mendimi im është që mazhoranca, kryeministri, kanë lexuar mirë rekomandimet e Komisionit të Venecias dhe kjo është për tu përshëndetur.
Komisioni thotë se presidenti ka tejkalim kompetencash, por nuk janë shkelje që të shkarkohet. Sjellja e mazhorancës dhe kyeministri është bashkëkohore. Mazhoranca ka marë parasysh rekomandimet e Komisionit të Venecias”, përfundoi Shkëlqim Hajdari.
Me 78 vota pro të Partisë Socialiste, 17 kundër dhe 8 abstenim Kuvendi i Shqipërisë miratoi raportin e hartuar nga relatorja socialiste Klotilda Bushka në Komisionin Hetimor që shpëton Ilir Metën nga shkarkimi nga posti i presidentit.
Kreu i qeverisë Rama theksoi në seancë se presidenti e ka shkelur rëndë Kushtetutën dhe se është sjellë si tutor i opozitës, duke përdorur postin për të nxitur konflikt. Ai shtoi se mazhoranca i nënshtrohet opinionit të Komisionit të Venecias, se shkelja nuk është aq e rëndë për të justifikuar shkarkimin nga detyra.
