Për herë të dytë, mazhoranca do të ngrejë një Komision Hetimor për të shkarkuar nga detyra, Presidentin e Republikës Ilir Meta.
Mësohet se në krye të këtij komisioni do të jetë deputeti i Partisë Socialiste, Alket Hyseni teksa nga deputetët e opozitës do të jenë pjesëtarë Myslim Murrizi, Halil Jakimi dhe Arlind Çaçani.
Interesant është fakti që deri më tani, asnjëri nga këta 4 deputetë nuk kanë arritur të marrin mandat në zgjedhjet parlamentare të 25 prillit.
Afati i punës së Komisionit Hetimor pritet që të jetë një muaj, përgjatë të cilit do të shqyrtohen të gjitha argumentet e ngritura nga PS për shkarkimin e tij.
Nisma për shkarkimin e Metës është firmosur nga 50 deputetë të PS, të cilët argumentojnë se Presidenti ka shkelur rëndë Kushtetutën para, gjatë dhe pas fushatës elektorale të 25 prillit.
Ndërkohë, Komisioni i Ligjeve thirri ditën e sotme në seancë dëgjimore Presidentin Meta, por ky i fundit nuk u paraqit për shkak të axhendës.
Kreu i Shtetit ka theksuar se është i gatshëm të paraqitet në Komisionin e Ligjeve më datën 10 maj.
