Në kohën kur mazhoranca ka nisur procedurat për shkarkimin e presidentit Ilir Meta, kryetari i PS Tiranë, Ervin Bushati, ka dhënë sinjale të qarta se postin do e marrë një grua. Këtë deklaratë ai e ka dhënë gjatë një interviste për emisionin “7 pa 5” në “Vizion Plus”. Duke komentuar procesin e shkarkimit të Metës, të iniciuar nga mazhoranca, Bushati tha se ka ardhur koha të vendoset një precedent.
“Ne jemi të qartë dhe kemi një Komision të dytë për të shkarkuar presidentin. Në këtë proces, Shqipëria është një Amerikë e vogël, po t´i referohemi “impeachment-it” atje. Duhet të vendosur një precedent, që ai që do jetë në krye të shtetit, që unë mendoj se duhet të jetë një femër, duhet të përfaqësojë denjësisht shqiptarët. Presidenca ka qenë benzina politike e këtyre zgjedhjeve”.
Kryetari i Komisionit Hetimor “Meta 2”, njëherësh deputeti i PS, Alket Hyseni, duke folur në mbledhjen e djeshme të Komisionit Hetimor, akuzoi Metën se ka shkelur Kushtetutën dhe ligjin me thirrjet dhe deklaratat e tij.
Sipas tij, Komisioni do të vërë në dispozicion të organit të akuzës deklaratat e bëra nga kreu i shtetit, në mënyrë që Meta të çohet për ndjekje penale. “Thirrjet mjerane për përmbysje, për korrje nga jugu në veri, thirrjet për të shpërndarë Parlamentin kur nuk ka asnjë tagër e kanë nxjerrë Presidentin e Republikës nga shinat. Veprimet e presidentit për vetëgjyqësi, shpërfytyrimi i individit, por edhe institucionit në përleshje me policë në ushtrim të detyrës, si rasti i Bashkisë të Tiranës, thirrjet për vetëgjyqësi të presidentit drejtuar popullit, thirrje për marrje sfurqesh, thirrje të tilla dhe më pas shoqërimi me vrasjen e një qytetari që mund të ishte edhe një anëtar partie që mund të bënte fushatë.
Të gjitha këto, gjykoj se mund të ketë përtej shkeljes së Kushtetutës elementë të veprës penale, që ne mund ta shohim nëse do të ketë vetëm një raport për shkelje të renda, apo mund t’ia bëjmë me dije Prokurorit të Përgjithshëm në drejtim të elementëve të veprës penale, në mënyrë që presidenti të shkojë për ndjekje penale”, deklaroi Hyseni.
