Në kohën kur të gjithë njerëzit po presin për krijimin e një vaksine, OBSH paralajmëron që të mos besojmë në ilaçet që po shiten si kurë ndaj këtij virusi.
Sipas Organizatës Botërore të Shëndetit, në ditët e sotme po shiten një numër i madh ilaçesh të rreme, sikur janë efikase për të trajtuar COVID-19.
OBSH ka deklaruar se përdorimi i tyre mund të ketë edhe “efekte anësore”. BBC raporton se në të gjithë botën, njerëzit po grumbullojnë ilaçe bazë. Sidoqoftë, me dy prodhuesit më të mëdhenj në botë të furnizimeve mjekësore si Kina dhe India që janë në izolim tashmë, kërkesa tani tejkalon furnizimin dhe qarkullimi i medikamenteve false është në rritje.
Operacioni Pangea, njësia globale e luftës kundër krimit farmaceutik, ka bërë 121 arrestime në 90 vende. Ata sekuestruan ilaçe të rrezikshme, vlera e të cilëve shkonte mbi 14 mln dollarë.
Nga Malajzia në Mozambik, oficerët e policisë konfiskuan dhjetëra mijëra maska të skaduara dhe ilaçe të rreme, shumë prej të cilave mendohet se kurojnë koronavirusin e ri.
“Tregtia e paligjshme e artikujve të tillë të falsifikuar mjekësorë gjatë një krize të shëndetit publik, tregon një mospërfillje totale për jetën e njerëzve,” tha Sekretari i Përgjithshëm i Interpolit, Jurgen Stock.
Sipas OBSH-së, tregtia e gjerë e ilaçeve të falsifikuara, e cila përfshin ilaçe të cilat mund të jenë të kontaminuara, përmbajnë përbërës të gabuar ose jo aktiv dhe kjo vlen më shumë se 30 miliardë dollarë në vendet me të ardhura të ulëta dhe të mesme.
