343 raste të personave të zhdukur janë raportuar në policinë e Kosovës, që nga fillimi i vitit 2018. Në gjashtë muajt e parë të këtij viti, janë raportuar 95 raste, ndërsa 248 rastet e tjera janë raportuar nga viti i kaluar.
Policia e Kosovës nuk ka treguar se sa prej këtyre rasteve janë zgjidhur, as për natyrën dhe lidhjen eventuale të këtyre rasteve, si: migrimi ilegal pa informuar familjen, martesë apo bashkëjetesë pa informim të familjes, trafikim i qenieve njerëzore, apo të tjera.
Sipas disa të dhënave të prezantuara nga Policia e Kosovës, në janar të këtij viti, rastet e trafikimit të qenieve njerëzore gjatë vitit 2018 kanë shënuar rënie në krahasim me vitin paraprak.
Gjatë vitit 2018 numri i viktimave të trafikuara ka qenë 15, nga të cilët 12 prej tyre me shtetësi kosovare. Kurse një vit më herët, në 2017 numri i viktimave ka qenë dyfish më i lartë, 32 nga të cilët 25 me shtetësi kosovare.
Zyrtarja e lartë në Ministrinë e Punës dhe Mirëqenies Sociale, në qeverinë e Kosovës, Adile Shaqiri, tha për radion Evropa e Lirë, se 17 viktimat e trajtuara në strehën shtetërore, gjatë vitit të kaluar janë të gjinisë femërore dhe pjesa më e madhe e tyre janë vajza të mitura.
Sipas zyrtares Shaqiri, shumë prej viktimave janë në ndikimin e narkotikëve, gjë që kërkon përgjegjësi dhe angazhim shtesë të stafit të strehës shtetërore.
“Shumica e viktimave janë nën ndikimin e substancave narkotike, nga 17 raste, 4 prej tyre ishin persona që konsumonin substanca të tilla. Normalisht, kjo është një përgjegjësi shtesë e stafit të strehimores, e cila trajton në aspektin psikologjik, social e kështu me radhë, përdorueset e substancave, ish-viktimat e trafikimit të qenie njerëzore”, u shpreh Adile Shaqiri.
