Britania e Madhe ka publikuar sot një dokument, sipas të cilit vërtetohet se Kina nuk e ka raportuar shifrën e vërtetë të numrit të të infektuarve nga koronavirusi.
Dokumentet e publikuara sot nga Grupi Këshillues Shkencor i qeverisë britanike për Emergjencat (Sage) tregojnë se numri i rasteve mund të jetë 10 herë më i madh, nga çfarë ka raportuar Pekini.
Sipas Grupit Këshillues Shkencor për Emergjencat (Sage), qëllimi nuk është për të nxjerrë Kinën gënjeshtare. Por sipas tyre Kina ka ende shumë pyetje për t’iu përgjigjur, rreth mënyrës se si u përball me shpërthimin e pandemisë.
Ambasadori kinez në Mbretërinë e Bashkuar, ka paralajmëruar deputetët se këto qëndrime mund të sjellin armiqësi mes vendeve dhe prishjen e marrëdhënieve.
“Deklarata të tilla shkaktojnë një virus politik, jo njerëzor. Nëse nuk mbahen nën kontroll, do të helmojnë marrëdhëniet me Kinën dhe solidaritetin ndërkombëtar. Shpërthimi i pandemisë në Kinë është nën kontroll dhe shifrat zyrtare janë reale. Ne po vazhdojmë të bashkëpunojmë me partnerët ndërkombëtar, në luftën e përbashkët që kemi”, tha ai në një konferencë.
