Ka shkuar në pesë numri i të infektuarve me COVID-19 te skuadra e Partizanit. Lajmin e ka bërë me dije klubi i Partizanit në orët e para të së premtes, kur janë marrë dhe përgjigjet për 50 teste të kryera për lojtarët dhe anëtarët e stafit të klubit. Lojtarët e prekur janë vendosur në karantinë në banesat e tyre, dhe do të presin deri në momentin që të shërohen për t’iu bashkuar ekipit.
Mbrëmjen e djeshme ka pasur një përplasje mes njërit nga lojtarët e Partizanit që rezultoi me koronavirus dhe mbrojtësit Deian Boldor, i cili kishte rezultuar pozitiv para dy ditëve. Mësohet se personi me të cilin është përplasur rumuni ka qenë Erald Çinari, shkruan “Panorama Sport” .
Fillimisht kanë pasur një debat në telefon, për shkak se Çinari ka rezultuar pozitiv. Ai i ka kërkuar llogari në telefon Boldorit, duke e akuzuar për pakujdesi. Mbrojtësi rumun ka mohuar që të ketë bërë veprime me qëllim, por më pas debati ka degjeneruar në të shara.
Çinari dhe dy lojtarë të tjerë janë nisur drejt shtëpisë së Boldorit, dhe pas një debati verbal ka pasur edhe përplasje fizike. Kjo ka alarmuar së tepërmi motrën e Boldorit, që ka filluar të bërtasë me të madhe.
