Gjykata e Fierit ka dhënë sot masën e sigurisë për 5 të arrestuarit, të cilët pas një zënke që nisi në një lokal në Levan, e vazhduan konfliktin e tyre edhe në ambientet e Spitalit Rajonal të Fierit.
I plagosur nga konflikti në spital mbeti Aleksandër Zhapaj, 51 vjeç, banues në Ferras, për të cilin është marrë masa “Arrest me burg”. Vendimi u mor në mungesë të tij, pasi ky i fundit nuk u paraqit në seancë.
Mësohet se më parë ai ka dërguar një shkresë, ku thotë se nuk është në gjendje shëndetësore për t’u paraqitur në gjykatë.
Sa i përket Daniel Braçes, i cili dyshohet se është edhe autori i plagosjes në mjediset e spitalit të Fierit, është vendosur masa “Arrest me Burg”, për veprën penale “Vrasje me dashje e mbetur në tentativë”.
Ndërsa për vëllain e tij, Gazmend Braçen, mbi të cilin rëndon akuza “Kundërshtim dhe mosbindja ndaj punonjësit të policisë”, togat e zeza kanë vendosur masën “Arrest Shtëpie”.
Edhe pse fillimisht u mësua se në mjediset e Gjykatës së Fierit do të mbërrinin edhe Aldo Zhapaj e Emiglend Kararaj, më pas u bë me dije se masa e tyre do të jepej në mungesë, kjo për faktin se ndodhen ende në spitalin e Fierit.
Kujtojmë se Aldo Zhapaj, 22 vjeç, banues në Ferras, dhe Emiglent Kararaj, 32 vjeç, banues në Vlorë, akuzohen për “Vrasje me dashje e mbetur në tentativë”, si dhe “Prodhim dhe mbajtje pa leje e armëve të ftohta”. Për 22-vjeçarin Zhapaj gjykata ka vendosur masën “Arrest Shtëpie”, ndërsa për 32-vjeçarin Kararaj “Arrest me Burg”. Gjyqtar i çështjes ndaj 5 të ndaluarve ka qenë Pirro Sota, ndërsa prokurore Eglantina Shehu.
