Së fundmi është shënuar viktima më e re në Evropë nga COVID-19.
Bëhet fjalë për një 12-vjeçare nga Belgjika e cila ishte infektuar nga koronavirusi dhe fatkeqësisht nuk arriti që të mposhte simptomat e rënda.
Vdekja në një moshë kaq të re “është një dukuri shumë e rrallë,” tha zëdhënësi i qeverisë Emmanuel Andre, duke shtuar se vdekja e saj “na tronditi të gjithë”.
Raportohet se vajza kishte pasur ethe për tre ditë para vdekjes së saj, dhe pas testimit rezultoi pozitive me COVID-19, tha një zëdhënës tjetër, Steven Van Gucht.
Asnjë detaj tjetër nuk u dha në lidhje me rastin e saj, përfshirë edhe pikëpyetjet nëse ajo kishte ndonjë problem tjetër shëndetësor.
Kjo ishte vdekja e parë e një fëmije të infektuar me koronavirus në Belgjikë, e cila tani ka regjistruar gjithsej 705 vdekje nga epidemia, sipas numrit të fundit zyrtar.
Kujtojmë se në Belgjikë janë ndërmarrë masa kufizuese, ashtu si në shumë shtete të tjera për shkak të koronavirusit.
Shkollat, restorantet dhe shumica e dyqaneve janë të mbyllura… hyrja në supermarkete është e kufizuar për të lejuar hapësirë për distanca sociale dhe qytetarëve u është thënë që të punojnë nga shtëpia.
