Mbrëmjen e sotme është shënuar viktima e tretë nga koronavirusi në Shqipëri.
Bëhet me dije se një 71-vjeçar i cili ishte shtruar në spitalin infektiv ka ndërruar jetë, pasi vuante edhe nga kanceri në mushkëri, në stad tejet të avancuar.
Viktima vuante nga sëmundje shoqëruese si kancer mushkërie, diabet mellitus, fibrilacion arterial dhe hipertension.
I moshuari bëhet kështu pacienti i tretë në Shqipëri që ndërron jetë nga koronavirusi. Dy viktimat tjera janë shënuar në Durrës dhe Lushnje.
Deri më tani janë raportuar 89 raste pozitive me koronavirus në vend.
Njoftimi i plotë i Ministrisë së Shëndetësisë:
Gjatë mbrëmjes së sotme ndërroi jetë një pacient i shtruar në spitalin Infektiv, i konfirmuar me COVID-19, i cili vuante nga kanceri në mushkëri, në stad tejet të avancuar.
71-vjeçari me origjinë nga Kuçova, i trajtuar më herët në spitalin universitar “Shefqet Ndroqi”, prej 7 ditësh ishte shtruar në spitalin Infektiv dhe gjatë mbrëmjes pati një komplikacion të menjëhershëm kardiak arterial.
71-vjeçari vuante nga disa sëmundje shoqëruese: Kancer mushkërie, diabet mellitus, fibrilacion arterial dhe hipertension.
MShMS shpreh ngushëllimet familjes së të ndjerit dhe apelon dhe një herë qytetarët të respektojnë rregullat e distancimit social dhe të telefonojnë 127 në rast se kanë shenja të sëmundjes.
