Ditën e sotme shumë artistë dhe qytetarë janë mbledhur para Teatrit Kombëtar duke protestuar në mënyrë që ai të mos prishet e shkatërrohet. Ndërkohë ka ardhur lëvizja e radhës nga Presidenti Ilir Meta.
Zyra për shtyp e Presidentit bën me dije se “Presidenti i Republikës Sh.T.Z Ilir Meta do të shkojë sot në ora 13:00 në Gjykatën Kushtetuese për të depozituar kërkesën për shpalljen antikushtetuese të ligjit për shembjen e godinës së Teatrit Kombëtar”.
Kujtojmë se më herët, teksa ndodhnin përplasjet mes artistëve që janë në mbrojtje të TK dhe policisë, Meta reagoi me një apel të fortë, si më poshtë: “Rrethimi me policë i Teatrit Kombëtar dhe përplasjet fizike me komunitetin e artistëve, të cilët janë aty në mbrojtjen e një prej vlerave të trashëgimisë tonë historike, kulturore e kombëtare, janë një ngjarje e shëmtuar dhe e turpshme. I bëj thirrje Policisë së Shtetit të respektojë artistët dhe të mos i dhunojë ata fizikisht në ushtrimin e së drejtës së tyre për të protestuar ndaj një vendimi abuziv e korruptiv për prishjen e godinës së Teatrit, dhe as t’i lëndojë ata shpirtërisht, në respekt të dinjitetit njerëzor dhe kontributeve të vyera që kanë dhënë për artin e kulturën kombëtare. As sampistët e Ramiz Alisë nuk e kanë prekur me dorë Edmond Budinën në dhjetor ‘90! Shumë turp! Shumë turp! Shumë turp”.
