Kandidati për kryetar i Partisë Demokratike, Agron Shehaj deklaroi se vendimi i parë që do të marrë nëse zgjidhet më 13 qershor, do të jetë ndrushimi i statutit. Gjatë një takimi me demokratët në Berat, Shehaj u shpreh se kryetari i cili do të humbasë zgjedhjet do të largohet, dhe nuk do të ketë mundësinë për të kandiduar përsëri.
Sipas Shehajt, Partia Demokratike duhet të zhvishet nga mentaliteti i humbësit dhe nga lehtësia me të cilën e pranon humbjen si të ishte vlerë.
Agron Shehaj: “Partia Demokratike duhet të zhvishet nga mentaliteti i humbësit dhe nga lehtësia me të cilën e pranon humbjen si të ishte vlerë. Ne nuk mund t’i lëvdojmë vendimet e gabuara e të themi “e provuam po nuk na eci” dhe pastaj të vazhdojmë njësoj.
Nëse zgjidhem kryetar, vendimi i parë që do ndërmarrë PD do të jetë ndryshimi i Statutit për të sanksionuar se kryetari që humb zgjedhjet largohet menjëherë, pa të drejtë rikandidimi, pa asnjë lloj justifikimi. Ky është standardi demokratik dhe evropian. Ngjitja pas karriges me çdo kusht është standard autokratik”.
Më 13 qershor, Partia Demokratike zhvillon zgjedhjet për kryetarin e ri. Përballë Lulzim Bashës, do të garojnë Edi Harxhi, Agron Shehaj dhe Fatbardh Kadilli.
