Detaje të reja zbardhen nga ngjarja e përpara një muaji ku një 29-vjeçar kreu vetëvrasje duke u hedhur nga kati i tretë i Sanatoriumit, ku ishte shtruar si pasojë e infektimit me Covid-19. 29-vjeçari i cili po merrte mjekim në spitalin “Shefqet Ndroqi”, i ka dhënë fund jetës duke u hedhur nga kati i tretë i spitalit.
I riu ishte drejt shërimit, dhe gjatë ditëve që ka marrë trajtim në spital, gjendja e tij ka qenë e qëndrueshme. Detajet e reja që dalin në dritë janë tronditëse, ku tregojnë se 29-vjeçari Xhino Koça kishte rreth një vit me probleme të shëndetit mendor, madje kishte kohë që po planifikonte vetëvrasjen.
Në celularin e tij është gjetur një sms që u kishte dërguar familjarëve të tij, ku shprehej se kishte vendosur ti jepte fund jetës, pasi kishte bërë gjëra përtej limiteve të tij. Në fund të sms thuhej: “Takohemi në botën tjetër”, citon “Fax News”.
Ky mesazh ishte ruajtur në telefonin e djalit disa muaj me parë, por u është dërguar familjarëve vetëm pak çaste përpara vetëvrasjes. Libri që po lexonte në momentet e fundit ishte ‘Testamenti’, i cili mbyllet me vetëvrasjen e personazhit kryesor duke u hedhur nga një lartësi e konsiderueshme.
Kujtojmë se jo më larg se dita e djeshme, një tjetër person ka kryer vetëvrasje duke u hedhur nga ambientet e Sanatoriumit. Një 65-vjeçar gjeti vdekjen e menjëhershme, pasi u hodh nga kati i katërt i spitalit.
Mësohet se policia ka marrë në pyetje disa familjarë dhe mjekë, që kanë ndjekur rastin e 65-vjeçarit nga Klosi, Hasan Miri.
Mjekët kanë deklaruar pranë grupit hetimor se i moshuari ka shfaqur gjatë ditës sjellje jo të qëndrueshme, dhe të rënduar psikologjike. Pas konfirmimit me Covid-19, mjekët i kanë rekomanduar 65-vjeçarit të qëndrojë i izoluar në shtëpi, por ditën e djeshme gjendja e tij shëndetësore është përkeqësuar.
Për këtë shkak ai u transportua në “Covid 2”, për trajtim më të specializuar mjekësor.
I moshuari ishte vjehrri i deputetit Gjetan Gjetani, i cili u shpreh se ditën e fundit ai kishte shfaqur gjendje të rënduar psikologjike.
