Ambasada Amerikane në Tiranë ka paralajmëruar shtetasit e saj që të shmangin grumbullimet më 13 maj, ditë e cila përkon me protestën e opozitës.
Në njoftimin e publikuar në faqen zyrtare të ambasadës, theksohet se nuk ka të dhëna për kërcënime ndaj qytetarëve amerikanë, por ata këshillohen të shmangin protestën.
“Ambasada u rikujton shtetasve amerikanë se edhe protestat paqësore mund të kthehen në konfliktuale, ndaj duhet të rishikoni planet për 13 majin”, thuhet në deklaratë.
Me këtë paralajmërim ambasada amerikane i druhet një përplasje të mundshme midis forcave politike, kur opozita ka paralajmëruar një marshim në bulevardin “Dëshmorët e Kombit” ditën e shtunë, për të kërkuar dorëheqjen e kryeministrit Rama dhe krijimin e një qeverie teknike, si garanci për zgjedhje të lira dhe të ndershme.
Pas frikës që lindi për mundësinë e protestave të dhunshme në qytetin e Kavajës, tani edhe 13 maji shikohet si një ditë e cila mund të sjellë konflikt midis opozitës dhe qeverisë.
