Nuk duket të ketë qetësi për SHBA-në e cila po shënon më shumë se 2 mijë viktima në bilancet ditore nga koronavirusi.
Në 24 orët e fundit, në Shtetet e Bashkuara janë shënuar gjithsej 2,360 viktima dhe janë konfirmuar 24,776 raste të reja infektimi.
Që nga shpërthimi i pandemisë, SHBA ka regjistruar 1.238.801 persona të infektuar dhe mbi 72 mijë viktima.
Rreth 201 mijë persona kanë arritur ta mposhtin koronavirusin në SHBA, ndërsa mbi 966 mijë raste janë ende aktive. Prej këtyre, mbi 16 mijë pacientë ndodhen në gjendje të rëndë shëndetësore.
Shteti amerikan New York është më i godituri në SHBA, me gjithsej 330.139 raste të konfirmuara dhe 25.204 viktima.
Pas SHBA-së, numrin më të madh të të infektuarve e ka regjistruar Spanja (253.682), Italia (213.013), Mbretëria e Bashkuar (194.990) dhe Franca (170,551).
Më shumë se 3,7 milionë njerëz nga e gjithë bota janë prekur nga COVID-19, ndërsa rreth 260 mijë persona kanë humbur jetën.
