Nga Elizabeth Warren “The Atlantic”
Shtetet e Bashkuara rrezikojnë të tërhiqen sërish në një luftë të panevojshme në Lindjen e Mesme. Përshkallëzimi impulsiv dhe i pamatur i konfliktit me Iranin, ilustron rrezikun që vjen nga zgjedhja e presidentit më të korruptuar dhe të pakualifikuar në historinë e kombit tonë, një njeri që ka pak ide se çfarë do të thotë, dhe që vendos veten para interesave të kombit.
Por kjo është ndërkohë pasojë e një qasjeje ndaj politikës së jashtme, që mbështetet tek angazhimi i ushtrisë amerikane në luftëra të pafundme. Dërgimi i ushtrisë për të luftuar diku, duhet të jetë vendimi më i vështirë që marrim ne si vend. Ndërkaq, kjo është bërë një rrugë e lehtë për të dyja partitë politike.
Për gati 2 dekada, Amerika është përfshirë në një seri luftërash në Lindjen e Mesme dhe më gjerë, të cilat na kanë bërë më pak, dhe jo më shumë të sigurt. Ato kanë pasur një kosto të madhe njerëzore dhe ekonomike. Dhjetëra mijëra ushtarë amerikanë janë vrarë ose plagosur, dhe shumë më tepër jetojnë me plagët e padukshme të luftës.
Miliona civilë kanë vuajtur pasojat. Këto konflikte kanë kushtuar triliona dollarë, të cilat mund të ishin investuar për nevoja më emergjente që ka sot SHBA-ja. Pushtimi i Irakut, e destabilizoi Lindjen e Mesme, fuqizoi Iranin, dhe krijoi kushtet që prodhuan ISIS-in.
Luftërat e lejuara nga SHBA-ja në Libi, Jemen, dhe gjetkë kanë sjellë katastrofa humanitare, duke krijuan terrene të reja trajnimi për terroristët. S’ka dyshim se veprimet e pakujdesshme të Trumpit – jo vetëm muajin e kaluar, por gjatë 3 viteve të fundit – e kanë bërë dukshëm më të keqe situatën në Lindjen e Mesme.
Pretendimi i Trump se e vrau Kasëm Sulejmanin për të “ndaluar një luftë” është naiv. Ai nuk po u jep fund luftërave; ai po i bën ato më të vështira për t’i përfunduar. Amerika duhet t’i japë fund përfshirjes së saj ushtarake në konfliktet në Lindjen e Mesme, dhe t’i kthejë në shtëpi trupat amerikane.
Së pari, unë do të kisha si gur themeli të qasjes sime, dhënien fund të këtyre luftërave, dhe ripërtëritjen e përpjekjeve për të krijuar zgjidhje diplomatike bazuar në objektiva realiste.
Në rastin e Iranit, nuk duhej të ishim larguar kurrë nga një marrëveshje bërthamore që po funksiononte, duke shkaktuar kësisoj një cikël të pashmangshëm përshkallëzimi.
Unë do ta ribëj pjesë të marrëveshjes SHBA-në dhe Iranin, nëse kjo është ende e mundur, dhe do të arrij një marrëveshje të re për të zgjatur afatin e të parës. Në Siri, ne duhet të ndjekim qëllime të qarta dhe të arritshme. Në vend se të bëjmë lojëra me dislokimin e trupave dhe misionet në terren, duhet të përdorim ndikimin tonë të mbetur, për të negociuar një ekuilibër të brishtë midis Sirisë, Turqisë, Rusisë dhe Iranit; zbutur krizën humanitare; dhe mbajtur në burgje luftëtarët e ISIS-it.
Së dyti, do të përqendroj përpjekjet tona në parandalimin e sulmeve terroriste, pavarësisht nëse ato e kanë origjinën në SHBA apo jashtë vendit, përmes koordinimit të punës së shërbimeve inteligjente dhe partneritetet e tjera ndërkombëtare. Këto mjete, kanë qenë tejet të suksesshme në parandalimin e sulmeve kundër SHBA-së që nga 11 Shtatori 2001, dhe më efektive e më pak e kushtueshme sesa të pushtosh vende të tjera.
Së treti, në administratën time Shtetet e Bashkuara do të jenë sërish në ballë të përpjekjeve ndërkombëtare, për të siguruar ndihmën humanitare dhe ekonomike, e cila është thelbësore për stabilizimin e Sirisë, Afganistanit dhe zonave të tjera të konfliktit në një periudhë afatgjatë.
Si pjesë e kësaj përpjekjeje, administrata ime do të zvogëlojë ndihmën ndaj qeverive të korruptuara, dhe do të fokusohet në ndihmën ekonomike që fuqizon qytetarët, dhe rrit zhvillimin human.
Së katërti, do të forcoj aleancat tona në Evropë, Azi dhe më gjerë, si një shtyllë thelbësore e sigurisë sonë kombëtare, duke i përditësuar ato për të adresuar sfidat reale të kohës sonë. Të gjitha këto hapa, do të kërkojnë investime reale në aftësitë tona diplomatike.
Kjo është arsyeja pse kam propozuar një plan për riorganizimin e Departamentit të Shtetit. Unë do të emëroj vetëm diplomatë të kualifikuar, dhe jo donatorë të fushatave elektorale, për të përfaqësuar interesat tona jetike jashtë vendit. Ne do ta përdorim ushtrinë tonë me mençuri. Të kesh një ushtri të fortë, do të thotë ta përdorësh atë me përgjegjësinë më të madhe.
Detyra e presidentit, është të garantojë sigurinë e amerikanëve. Çdo ditë, ushtria jonë është e angazhuar në mbarë botën në trajnimin e forcave partnere, mbrojtjen e ambasadave tona, sigurimin e ndihmës humanitare, dhe ruajtjen e sigurisë së transportit detar.
Por ne duhet të rivlerësojmë sjelljen tonë globale, për t’u siguruar që forcat amerikane të jenë të angazhuara në misione realiste, dhe që rreziqet të jenë të kufizuara. Unë jam e përkushtuar të kërkoj autorizimin e Kongresit, nëse do të kërkohet përdorimi i forcës. Trump ka shkelur shpesh normat ndërkombëtare, dhe e ka dëmtuar reputacionin tonë në skenën ndërkombëtare.
Por abuzimet e tij janë të mundura vetëm për shkak të zgjedhjeve, që kemi bërë gjatë dekadave në emër të sigurisë kombëtare, të cilat lejuan dobësimin e kontrollit dhe ekuilibrave të sistemit tonë, dhe kjo gjë po komprometon tani vlerat dhe idealet e kombit tonë. Ne duhet të bëjmë atë që në fakt i bën amerikanët të sigurt, dhe t’i japim fund luftërave tona të pafundme./TIRANA TODAY
Shënim: Elizabeth Warren është senatore e Masaçusetsit në SHBA, njëherazi një nga kandidatet kryesore të Partisë Demokratike për president.
