Policia e Sarandës ka arrestuar një 52-vjeçar ditën e sotme, pasi po kryente një ndërtim pa leje. Në pranga ka rënë shtetasi i identifikuar si Lefter Marku, 52 vjeç, banues në Ksamil, Sarandë.
Sipas uiformave blu, ai u konstatua duke ndërtuar një objekt shtesë në një objekt ekzistues në truallin në pronësi të tij, i papajisur me leje ndërtimi nga autoritetet kompentente.
Mesa duket, 52-vjeçari nuk i është bindur urdhrit të kryeministrit Edi Rama, për shembjen e objekteve pa leje.
Njoftimi i policisë
Sarandë
Kryente ndërtime pa leje, vihet në pranga pronari i truallit.
Në zbatim të detyrave të përcaktuara në planin e veprimit të hartuar nga Drejtoria e Përgjithshme e Policisë së Shtetit, për marrjen e masave me qëllim parandalimin, evidentimin dhe ndëshkimin e ndërtimeve pa leje, veçanërisht brenda vijës së verdhë në zonat urbane, shërbimet e Komisariatit të Policisë Sarandë gjatë kontrollit të territorit në Ksamil, kanë konstatuar se brenda vijës së verdhë po kryhej një ndërtim pa leje.
Në vijim të veprimeve u bë arrestimi në flagrancë për veprën penale “Ndërtimi i paligjshëm”, i shtetasit L. M., 52 vjeç, banues në Ksamil, Sarandë.
Arrestimi i këtij shtetasi u bë pasi u konstatua në lagjen Nr. 2, Ksamil, duke ndërtuar një objekt shtesë në një objekt ekzistues në truallin në pronësi të tij, i papajisur me leje ndërtimi nga autoritetet kompentente.
Materialet procedurale i kaluan Prokurorisë, për veprime të mëtejshme, për veprën penale “Ndërtimi i paligjshëm”.
