Greqia është e hapur për bisedime me Turqinë. Është ky mesazhi i përcjellë nga ana e kryeministrit grek, pas një takimi me presidentin e Këshillit Evropian (KE), Charles Michel, ku zhvilluan një konferencë të përbashkët për media.
Kryeministri i Greqisë, Kyriakos Mitsotakis, është shprehur se në rast se Turqia hedh një hap më tej, janë të gatshëm për bisedime eksploruese për përcaktimin e juridiksioneve detare.
Kryeministri grek tërhoqi vëmendjen në rëndësinë e Mesdheut për sigurinë e gjithë Evropës, duke pohuar se vendi i tij është i hapur për dialog.
Ai tha se “i gjithë Mesdheu është i ndjeshëm në këtë periudhë”, ndërsa në lidhje me krizën që përjetojnë me Turqinë, ai pretendoi se “jo vetëm Greqia, por edhe interesat gjeopolitike dhe strategjike të BE-së janë nën kërcënim”.
“Në rast se shohim hap konkret nga ana e Turqisë, për çështjen e vetme të mosmarrëveshjes (përcaktimi i juridiksioneve detare) jemi të gatshëm të fillojmë menjëherë bisedimet eksploruese”, u shpreh më tej ai.
Greqia dhe Turqia janë aleatë në NATO, por marrëdhëniet e tyre kanë qenë prej kohësh të mbushura me tension. Mosmarrëveshjet kanë filluar nga kufijtë e rafteve kontinentale në det të hapur, dhe hapësirën ajrore deri në ishullin etnik të ndarë në Qipro. Në vitin 1996 ata pothuajse shkuan në luftë për pronësinë e ishujve të pabanuar në Detin Egje.
