Kryeministri Rama iu përgjigj opozitës dhe kryedemokratit Basha lidhur me kërkesën për të shtuar testimet. Ai këshilloi kreun e PD-së, që të mos bëjë një opozitë të llojit skarco. Me ironi, kreu i qeverisë parashtroi pyetjen nëse PD është Institut i certifikuar nga OBSH-ja?!
“Të dhënat e djeshme ishin inkurajuese, tani po ngjisim majën e kodrës dhe do të na thonë ekspertët. Dua t’i përsëris Lulzim Bashës, s’është koha për të bërë opozitë të llojit skarco. S’është kjo koha.
PD mendon që testet do të bëhen kështu? Kush është PD? Institut i certifikuar nga OBSH-ja? Në fakt edhe për tabelën e shumëzimit ka pikëpamje të ndryshme nga shkenca. Si mund të sulmohen ata që sot po punojnë me stres, ata ekspertë që thotë Lulzimi, se thonë atë që thotë kryeministri.
Jo Lulzim, unë flas atë që më thonë ata. Testet i bëjnë ata, do ti apo s’do ti. Është koha të kontribuosh për të fituar luftën, jo për të treguar që s’dini akoma që dihet.
Është koha për të koordinuar së bashku. Ta kam thënë në sy, nëse keni diçka që ju shqetëson, pyesni. Ju shqetësojnë testet? Pyesni, verifikoni dhe na ndihmoni të korrigjohemi nëse kemi probleme. S’mund të vazhdojmë me forma komunikimi ordinere në kohë paqeje, e më shumë se ordinere, kriminale në kohë lufte”.
