Në një kohë kur të dyja shtetet janë prekur nga koronavirusi, Serbia ka vendosur që të ndihmojë me teste Kosovën.
Mirëpo ky gjest nuk është pritur mirë nga opozita në Kosovë.
Ajo e ka kritikuar qeverinë për pranimin e kësaj ndihme nga Serbia, duke e akuzuar atë që i lejoi Serbisë një promovim të mirë në botë.
Ndërsa nga ana tjetër, kryeministri ende në detyrë Albin Kurti, ka thumbuar opozitën, teksa kërkoi publikisht që të mos politizohet ndihma në teste që Serbia i bëri Kosovës.
Në një konferencë për media të hënën, Kurti tha se Kosova e ka dëshmuar që nuk bën dallime midis qytetarëve sipas komunës, partisë, moshës, gjinisë, fesë apo përkatësisë etnike.
Ai shtoi se Ministria e Shëndetësisë dhe Instituti i Shëndetit Publik do të vendosin se si t’i përdorin të gjitha testet në dispozicion të Kosovës:
“Ne nuk po bëjmë diskriminim dhe jam i bindur që nëse Kosova do të refuzonte të pranonte këto teste, do të akuzohej për sjellje joracionale dhe politizim të një gjesti i cili nuk është i tillë. Kosova dëshiron marrëdhënie të mira fqinjësore dhe bashkëpunim më të madh rajonal në luftën e përbashkët kundër pandemisë”.
