Presidenti i Serisë Vuçiç ka deklaruar se Beogradi nuk do të pajtohet me ultimatumin që Prishtina dhe mentorët e saj perëndimorë vendosën përmes platformës për dialogun, miratuar të enjten nga Kuvendi i Kosovës.
“Bashkimi Evropian më ka mashtruar pasi kishte premtuar se ajo platformë as nuk do të jetë në rend dite të Kuvendit të Kosovës”, tha Vuçiç gjatë një tubimi në Mitrovicën e Sremit, duke shtuar se Kosova dhe partnerët e saj duan të shkatërrojnë Serbinë.
Edhe kryeministrja serbe Ana Brnabiç është shprehur kundër platformës së Kosovës për bisedime me Serbinë. Sipas saj, miratimi i kësaj platforme nga ana e Prishtinës është goditja e fundit që i bëhet dialogut ndërmjet Prishtinës dhe Beogradit.
Më herët Bashkimi Evropian vlerësoi se platforma për bisedime me Serbinë e miratuar nga Kuvendi i Kosovës paraqet “pozicionin vetëm të njërës palë”.
“Bashkimi Evropian, si ndërmjetës, nuk i komenton pozicionet individuale të palëve në dialog, por është më se e qartë se vetëm përmes dialogut mund të arrihet një marrëveshje përfundimtare”, ka thënë zëdhënësja e BE-së, Maja Kocijançiç.
