Guvernatori i Bankës së Shqipërisë, Gent Sejko njoftoi se17 mijë persona kanë humbur punën gjatë periudhës së pandemisë.
Sipas tij, ekonomia është tkurrur me 2.52% dhe rënia pritet të vijojë përgjatë 2020. Sejko shtoi se përmirësimi parashikohet vetëm në tremujorin e dytë të vitit të ardhshëm.
“Ekonomia ka qenë nën efektin e fortë të pandemisë në tremujorin e dytë. Reduktimi i kërkesës kanë sjellë rënie të prodhimit dhe rritje të papunësisë. Sektori banker mbetet i shëndetshëm. Hapja e ekonomisë dhe ambienti i qëndrueshëm krijojnë premise për të pasur rritje në vijim. Miksi aktual i politikave fiskale dhe monetare është i duhur. Sipas të dhënave ekonomia u tkurr me 2.52%. Ekonomia humbi 17 mijë vende pune gjatë pandemisë. Goditja e pandemisë është forcuar edhe më tej dhe tregtia apo eksporti u tkurr me 33%. Të ardhurat buxhetore u tkurrën me 30% në tremujor duke reflektuar rënie të konsumit. Ekonomia pritet të shënoi një rënie të madhe në vitin 2020. Aktiviteti ekonomik pritet të shënojë pikun negative në tremujorin e dytë. Në gjysmën e dytë të vitit 2021 do të ketë një stabilizim të ekonomisë. Inflacioni pritet të qëndroj pranë niveleve aktuale. Bankat kanë rritur kreditimin për bizneset duke i mbështetur me likuiditet për përballimin e krizës. Madje bankat kanë marrë përsipër edhe goditjet mbi supe duke dhënë kredi”, tha ai.
Sejko komentoi edhe eurobondin 650 mln euro që Shqipëria ka marrë, duke theksuar se marrja e tij i siguron qeverisë fondet e nevojshme për përballimin e pandemisë dhe i lehtëson punën e bankave të nivelit të dytë.
“Marrja e eurobondit i siguron qeverisë fondet e nevojshme për përballimin e pandemisë dhe i lehtëson punën e bankave të nivelit të dytë.
Eurobondi ishte një mjet i domosdoshëm dhe një element pozitiv për ekonominë në këtë situatë ku ndodhemi. Norma e interesit është në një nivel mjaft të mirë. Momenti i daljes së eurobondit ishte një moment pozitiv”, tha ai.
