Sekretari i Përgjithshëm i Partisë Demokratike, Gazment Bardhi shprehet se në ditën e zgjedheve lokale nuk do të ketë konflikt civil, ndërsa deklaroi se Ilir Meta nuk i ka dërguar një ftesë PD për të qenë pjesë e tryezës midis tij dhe partive të vogla.
“Nuk do të ketë luftë mes demokratëve dhe socialistëve, ky është qëndrimi im dhe besoj edhe qëndrimi i Partisë Demokratike. Nuk kemi nxitur kurrë konfrontim civil mes qytetarëve shqiptarë”, deklaroi Bardhi.
Sipas tij, vendimi i partive të vogla aleate nuk ka qenë një vendimmarrje koalicioni, por individuale, teksa shton se nuk është diskutuar për këtë çështje.
“Ata i kanë bërë thirrje presidentit të marrë përgjegjësitë e veta kushtetuese sepse Presidenti përfaqëson popullin. Jemi në krizë institucionale. Nuk ka qenë një vendimmarrje e koalicionit. Ka qenë një iniciativë e tyre. Nuk është diskutuar më parë kjo çështje.
Secila nga partitë e koalicionit opozitar ka iniciativat e veta politike. Kjo çështje nuk është shtruar në diskutim.
Në dijeninë time, Presidenti nuk ka ftuar Partinë Demokratike. Sapo të kemi një ftesë do ta shqyrtojmë dhe do ta bëjmë publik. Marrëveshje me Edi Ramën nuk ka për të patur”, tha Bardhi në “Rtsh”.
