Sivjet plazhi nuk do të jetë si më parë, si pasojë e masave drastike ndaj koronavirusit. Drejtoresha e Mjedisit dhe Turizmit, Rovena Moçka, tha në një intervistë për Report Tv, se gjatë këtij sezoni turistik s’do ketë më festa nate, schiuma party dhe grumbullime e aktivitete në grup.
“Aktivitetet me schiuma party, festa në lokale nate që nuk mundësojnë distancim fizik dhe qasjen e higjienës, nuk do të zhvillohen në këtë faze. Ajo që do të shohim në vijimësi si të mund të zhvillojmë aktivitete të ndryshme nga aktivitete masive, që janë zhvilluar në të kaluarën. Duke qenë se janë të pamundshme në këtë periudhë pandemie. Të gjitha aktivitetet do jenë duke siguruar higjienën dhe distancën”, tha Moçka.
Edhe prania e çadrave në plazh, do të jetë e përqendruar vetëm në ato hotelerie që kanë aplikuar. Rovena Moçka tha se të gjitha shërbimet e ofruara do të vijnë nga një personel i pajisur mirë me maska e doreza.
“2020 nuk ishte një vit i zakonshëm, por duhet të qasemi me rregulla të reja. Duhet të fillojmë të adoptohemi me kushtet e reja, edhe në marrjen e shërbimet turistike. Ajo që ka ndryshuar është mënyra si duhet të menaxhojmë plazhin edhe atë publik.
Duke qenë se do të kemi një armatë më të madhe të monitorimit të masave dhe njerëzve, ka ndryshuar edhe mënyra se si do të jepen stacionet e plazhit, ku prioritet kanë strukturat e qëndrueshme, ato hoteliere. Një shërbim i kontrolluar janë për hoteleritë në vijën e parë të plazhit, pasi këto struktura janë më të kontrolluara dhe më të monitoruara.
E gjithë kjo procedurë por dhe e vendosjes së rregullave për operatorët turistikë, do të ndiqen nga komiteti i menaxhimit dhe mbarëvajtjes së sezonit turistik. Maskat dhe dorezat janë të rekomanduara deri tani për personelin që ofrojnë shërbimet dhe në kontakt të drejtpërdrejtë me njerëzit. Ajo është e rekomanduar në deri në ditët e sotme, por do të shohim në vijimësi të situatës”, tha Moçka.
