Ministri i Brendshëm Sandër Lleshaj ishte i ftuar mbrëmjen e sotme në emisionin “Real Story” në “News 24” prej ku foli për situatën e krijuar nga koronavirusi në vend.
Lleshaj theksoi se gjendja në Shkodër është serioze.
Ai deklaroi se nuk e di se çfarë veprimesh ka ndërmarrë kryebashkiakja e Shkodrës Voltana Ademi për frenimin dhe parandalimin e përhapjes së COVID-19.
“Qytetarët kanë nevojë për orientim. Autoritetet vendore do ta bëjnë detyrën në përputhje me orientimet e marra. Nëse ka raste si të Shkodrës sigurisht që do ndërhyjmë.
Vajtja ime ishte për të parë riformatimin e tregjeve a janë në kushtet e duhura dhe fatkeqësisht nuk ishin. Ne i kemi lënë hapësirën dhe kohën që qeveria vendore të bëjë atë që i takon.
Nuk e di se çfarë ka bërë Kryetarja e Bashkisë Shkodër për frenimin dhe parandalimin e përhapjes së kësaj pandemie, ende nuk e di çfarë ka bërë.
Gjendja në Shkodër është serioze sepse kemi pasur një shpërthim jashtë tendencës kombëtare të koronavirusit.
E vetmja gjë që na shqetëson për momentin është vendosja e një bashkëpunimi real në funksion të uljes së këtij rreziku. Ne jemi të detyruar nga ligji të ofrojmë mbështetje, ashtu si Kryetarja e Bashkisë Shkodër që është e detyruar të bashkëpunojë”, tha Lleshaj.
