Nga Klodian Tomorri:
Bernie Sanders, një nga aspirantët e së majtës amerikane për President, është një nga avokatët më të fortë të rritjes së pagës minimale. Në parafushatën e këtij viti, në shumicën e daljeve të tij publike, kali i betejës elektorale të Sandersit ka qenë premtimi se në SHBA nuk do të ketë asnjë punonjës që paguhet më pak se 15 dollarë në orë.
Tezat e majta me rritje pagash për shumicën e qytetarëve, që financohen nga rritja e taksave për të pasurit janë joshëse për elektoratin. Edhe në Shtetet e Bashkuara, ndodh e njëjta gjë.
Por sapo amerikanët nisen të besonin Sandersin, në media shpërtheu një lajm ironik. Punonjësit e stafit elektoral të Sanders hynë në grevë. Shkaku? Sanders i paguante më pak se sa 15 dollarë në orë. E majta dhe hipokrizia flirtojnë shpesh me njëra-tjetrën.
I turpëruar nga publikimi i lajmit, Sanders nxori shefin e shtabit elektoral të deklaronte se të gjitha pagat e punonjësve të stafit do të rriteshin menjëherë në 15 dollarë për orë. Por këtu fillon kapitulli i dytë i hipokrizisë. Në të njëjtën kohë që njoftuan rritjen e pagave, Sanders dhe shefat e tij te fushatës urdhëruan reduktimin e orëve të punës për stafin.
Për ta thënë më qartë, të ardhurat për punonjësit e Sanders mbeten ne po të njëjtat nivele, pasi rritja e rrogave u shoqërua me uljen e orëve të punës.
Bota nuk funksionon sipas premtimeve të politikanëve, por në bazë të ligjeve të fizikës, matematikës, dhe ekonomisë. Dhe një nga ligjet bazike të ekonomisë, është: sa herë që çmimi i një malli rritet, kërkesa për këtë mall bie. Kjo vlen edhe për punën.
Në fakt ky është thelbi i gjithë debatit për rritjen e pagës minimale me ligj. Sapo një qeveri urdhëron rritjen e pagës minimale, bizneset shkurtojnë vendet e punës. Sandersi, pati fatin e keq që ishte edhe “qeveri” edhe punëdhënës në të njëjtën kohë dhe i bëri të dyja. Edhe rriti pagën minimale edhe u shkurtoi orët e punës punonjësve duke i lënë me të njëjtin nivel të ardhurash.
Historia e Sanders mu kujtua një ditë më parë, teksa dëgjova kryetarin e opozitës, zoti Basha të premtojë se do të rriste pagën e detyrueshme minimale ne 300 euro. Sigurisht, edhe këtë herë të ardhurat do të gjenden nga taksimi i të pasurve. Ose më mirë oligarkëve.
